Режиссер Кристофер Нолан Британ империясының орденін ағылшын королі Карл III-ден алды. «Интерстеллар», «Қара рыцарь» трилогиясы және «Оппенгеймер» фильмдерінің авторы кино саласындағы жетістіктері үшін марапатталды. Оның жары, продюсер Эмма Томас, ханым-командор атағына ие болды. Марапаттау рәсімі 18 желтоқсанда Букенгем сарайында өтті.
«Жұп киноға қосқан айырықша үлестері үшін мойындалды. Олардың серіктестігі «Қара рыцарь» трилогиясы мен «Оппенгеймер» сияқты ірі блокбастерлердің түсірілуіне себеп болды», — делінген Букенгем сарайының Instagram парақшасындағы хабарламада.
— Король «Оппенгеймерді» көргенін және оған ұнағанын айтты. Ол біздің жұмысымызды білетіні және фильмдермен таныс екені өте қуантты. Иә, ол мені тағы да фильмдер түсіруге ынталандырады деп үміттенді, — деп айтты Кристофер Нолан DailyMail басылымына корольмен әңгімесі туралы.
Сэр Кристофер Эдвард Нолан — британдық және американдық кинорежиссер, сценарист және продюсер. Тарихтағы ең кассалық режиссерлердің бірі, сондай-ақ ең танымал және ықпалды кинематографистердің бірі. Ол 1998 жылы «Қудалау» фильмінде режиссер ретінде дебют жасады. 2000 жылы Нолан «Есіңде сақта» атты екінші фильмін түсірді, ол үшін көптеген марапаттарға, соның ішінде ең үздік оригинал сценарийі үшін «Оскарға» номинацияланды. Тәуелсіз фильмдер арқылы алған танымалдылығы Ноланға 2002 жылы «Ұйқысыздық» (2002) және 2006 жылы «Престиж» атты жоғары бюджеттегі триллерлерді түсіруге мүмкіндік берді. Ол «Қара рыцарь» трилогиясы (2005—2012); «Бастау» (2010); «Интерстеллар» (2014) және «Дюнкерк» (2017) сияқты жұмыстарымен көрермендердің назарын аударып, сыншылардан жақсы пікірлер алды, бұл оған ең үздік режиссура үшін алғашқы «Оскар» номинациясын әкелді. 2023 жылы «Оппенгеймер» фильмі шықты, ол 7 «Оскар» марапатын жеңіп алды.
Ноланның он фильмі әлем бойынша 6,7 миллиард доллардан астам табыс жинап, барлығы 28 «Оскар» номинациясын алды, олардың сегізінде жеңіске жетті. Нолан бірнеше фильмнің сценарийлерін кіші інісі Джонатанмен және жары Эмма Томаспен бірге жазды.
2019 жылдан бері Нолан Британ империясының ордені командоры атағын иеленіп келеді.